Satsǫ́ ahsı́ı łǫ kenandı́h ts’ęhk’eh ahsı́ı meghǫedı́h: Azhı́ı gots’ęhk’eh datł’éh sı́ı meghǫedı́h | CRTC
Satsǫ́ ahsı́ı łǫ kenandı́h ts’ęhk’eh ahsı́ı meghǫedı́h: Azhı́ı gots’ęhk’eh datł’éh sı́ı meghǫedı́h
Satsǫ́ ahsı́ı łǫ kenandı́h ts’ęhk’eh ahsı́ı meghǫedı́h la met’áh amı́ı satsǫ́ ahsı́ı łǫ kenandı́h t’ah aget’ı̨ ts’ęhk’eh goghǫedı gha, káondıh énıdé megháádé gondı ehtth’ı̨́ gots’ę́ andéh gha gots’ęh met’áh ats’et’ı̨ ts’ęhk’eh edı̨htł’éh k’eh gozı̨ nıts’enıɂǫ sı́ı nezų keots’edı́hshǫ gha. Azhı́ı gots’ęhk’eh datł’éh sı́ı mets’ęhk’eh nezų keodahɂá gots’ęh amı́ı ts’ęh satsǫ́ ahsı́ı łǫ kenandı́h t’ah at’ı̨ énıdé gots’ęh azhı́ı t’ah nezų agot’ı̨le sı́ı dáondıh t’ah edeghá seegoałeh gha nezų megoaɂá.
Amı́ı satsǫ́ ahsı́ı łǫ kenandı́h ts’ęhk’eh t’ah gots’agendı́ énıdé edı̨ Satsǫ́ ahsı́ı łǫ kenandı́h ts’ęhk’eh ahsı́ı meghǫedı́h t’ah aget’ı̨ gha goɂǫ
Edı̨ la amı́ı satsǫ́ ahsı́ı łǫ kenandı́h ts’ęhk’eh goxee eghálagenda sı́ı (ISPs) gots’ęh amı́ı gots’ęh satsǫ́ ahsı́ı łǫ kenandı́h gots’ęh amı́ı gonáa goxee eghálagenda sı̀ı, edı̨ satsǫ́ ahsı́ı łǫ kenandı́h ts’ęhk’eh ahsı́ı meghǫedı́h k’ę́ę́ eghálagenda gha goɂǫ:
- Bell Canada chu
- Cogeco Connexion chu
- Eastlink chu
- Northwestel chu
- Rogers chu
- SaskTel chu
- TELUS chu
- Videotron chu
- Xplore chu
Kǫt’ı̨ amı́ı sée goɂǫ satsǫ́ ahsı́ı łǫ kenandı́h ts’ęhk’eh t’ah eghálagı̨́déh kóó, Edı̨ amı́ı mezhı́h gots’endeh ts’edéhtth’ǫ́, edı̨htł’éh noat’ı̨ chu gots’ęh met’áh ehłets’ę́ gots’endeh ahsı́ı káondıh sı́ı azhǫ satsǫ́ ahsı́ı łǫ kenandı́h ts’ęhk’eh ahsı́ı meghǫedı́h k’ę́ę́ k’eogeɂá gha goɂǫ.
Edı̨ amı́ı mezhı́h gots’endeh ts’edéhtth’ǫ́, edı̨htł’éh noat’ı̨ gots’ęh met’áh ehłets’ę́ gots’endeh ts’ęhk’eh goxee nezų agot’ı̨ le énıdé, Satsǫ́ ahsı́ı łǫ kenandı́h ts’ęhk’eh ahsı́ı meghǫedı́h geghǫı́ndı́h gha (CCTS). Edı̨ amı́ı satsǫ́ ahsı́ı łǫ kenandı́h ts’ęhk’eh t’ah gots’agendı sı́ı, ededı̨ gha satsǫ́ ahsı́ı łǫ kenandı́h ts’ęhk’eh edı̨htł’éh goxee séets’ı̨la sı́ı, azhǫ amı́ı káondıh t’ah aget’ı̨ zhee ts’ę́ nezų k’eogeɂá gha goɂǫ.
Azhı́ı gots’ęhk’eh satsǫ́ ahsı́ı łǫ kenandı́h k’eh datł’éh sı́ı meghǫedı́h gha
Satsǫ́ ahsı́ı łǫ kenandı́h ts’ęhk’eh goxee edı̨htł’éh séets’ı̨la sı́ı,dáondıh datł’éh kı́ı dezhı́ıle t’ah azhı́ı ghǫh agedı̨ káa dulé męots’ı̨ɂá
- Edı̨htł’éh goxee séets’eléh gha énıdé, azhı́ı ghǫh agedı̨ kı́ı naotı̨ le t’ah męots’ı̨ɂá.
- Dáondıh t’ah satsǫ́ ahsı́ı łǫ kenandı́h t’ah ats’et’ı̨, mezhǫą , saámba menandáh nı̨ts’ı le gots’ęh naots’endı́h le énıdé goch’á gondagenchu, ahsı́ı káondıh ts’ęhk’eh edı̨htł’éh gots’ę́ ageléh gha.
Azhı́ı dadéhtı sı́ı zhee ts’ęhk’eh gondı gondáh agedı̨ gha
- Azhı́ı dadéhtı, ahsı́ı łǫ łaot’e náts’endı́h, azhı́ı k’eɂǫ detı̨ gots’ęh azhı́ı daededháa ts’ę́ detı̨ le chu káondıh ts’ęhk’eh gondáh agedı̨ gha.
- Azhı́ı edı̨htł’éh k’eh datł’éh mets’ę́ ghǫ dındı̨ sı́ı, edı̨ satsǫ́ ahsı́ı łǫ kenandı́h ts’ęhk’eh, azhı́ı ghǫh agedı̨ sı́ı sée nezų nendáh agedı̨ gha.
Daededháa satsǫ́ ahsı́ı łǫ kenandı́h met’áh ats’etı̨ gha gedı̨ gots’ęh mets’ęh xone agujáa énıdé, ezhı́ı chu káa dulé menandáh séegots’eléh
- Daededháa satsǫ́ ahsı́ı łǫ kenandı́h met’áh ats’etı̨ gha gedı̨ énıdé gondáh agedı̨ gha.
Ahsı́ı mets’ęhk’eh gúlı́ı aołéh enedhé gots’ęh ahsı́ı gúlı́ı gháında chu enedhé
- Azhı́ı mets’ę́ ghǫ dındı̨ gots’ęh azhı́ı mets’ęhk’eh edı̨htł’éh goxee séenelá gots’ęh kı́ı nezų ełexee thelá la énıdé, káa dulé kı́ı nagoı̨́ndı́h le t’ah dı́ı hono ɂǫ́ǫ́ sųláı dzę ts’ę́, azhǫ ahsı́ı káondıh mets’ęhk’eh ı̨́le góhdındı̨́.
- Kót’ı̨h azhı́ı edı̨htł’éh goxee séenela gots’ęh kı́ı satsǫ́ ahsı́ı łǫ kenandı́h neghá dzǫ́ǫt’e énıdé, ezhı́ı chu mets’ęhk’eh edı̨htł’éh t’ah datł’éh énıdé, káa dulé hono ɂǫ́ǫ́ sųláı dze ts’ę́ mek’eh eghálaı̨́nda.
- Daededháa ts’ę́ satsǫ́ ahsı́ı łǫ kenandı́h t’ah anet’ı̨ gots’ęh neghá dzǫ́ǫt’e énıdé, káa dulé ǫkı xaye ts’ę́ danet’e mek’eh naots’endı́h ts’ęhk’eh edeghá seeguleh.
Satsǫ́ Ahsı̀ı Łǫ Kenandı́h ts’ęhk’eh nezų agot'ı̨
Satsǫ́ ahsı́ı łǫ kenandı́h k’eh ahsı́ı gonáa thela ǫt’e