ᔫᓂ 2019ᒥᑦ, ᑖᒃᑯᐊ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ (CRTC) ᓴᖅᑮᓚᐅᖅᑐᑦ ᑐᓴᖅᓴᐅᑎᑦᑎᓂᕐᒧᑦ ᖃᐅᔨᒃᑲᐃᕈᑎᒥᒃ ᑲᔪᓯᓂᖃᕐᓂᐊᕐᓂᖓᓄᑦ CRTC 2019-217, ᐱᖓᓲᓕᖅᑲᖓᓪᓗᓂ ᐱᓕᕆᐊᖑᔪᖅ ᐱᕙᓪᓕᐊᑎᑦᑎᖃᑎᒌᓐᓂᕐᒥᑦ ᓄᑖᖑᔪᒥᑦ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᒥᑦ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ. ᓯᕗᓪᓕᖅᐹᒥᑦ ᐱᓕᕆᐊᖑᔪᖅ ᐃᓚᖃᓚᐅᖅᐳᖅ ᐅᖃᖃᑎᖃᖅᓴᕋᐃᓐᓂᕐᒥᑦ ᐋᖅᑭᒃᓱᐃᓂᕐᒧᑦ ᒪᓕᒃᑕᐅᔪᒃᓴᓂᑦ ᐊᒻᒪᓗ ᐊᖏᓂᕆᓂᐊᖅᑕᖓᓄᑦ ᐃᓄᓕᒫᓂᒃ ᐅᖃᖃᑎᖃᕐᓂᐊᖅᑎᓪᓗᒋᑦ, ᐃᑲᔫᑎᖃᖁᓪᓗᒍᓗ ᓇᓗᓇᐃᖅᓯᓂᕐᒥᑦ ᐱᔭᐅᔭᕆᐊᓕᖕᓂᒃ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᖅᑕᐅᕙᒃᑐᓂᑦ ᑲᓇᑕᒥ.
ᐊᑯᓐᓂᖏᓐᓂᒃ ᔫᓂ 2019 ᐊᒻᒪᓗ ᕕᕝᕗᐊᓕ 2020, ᑲᒥᓴᖓᑦ ᑲᑎᖃᑎᖃᓚᐅᖅᑐᑦ ᓄᓇᖃᖅᑳᖅᓯᒪᔪᓂᑦ ᑐᓴᖅᓴᐅᕙᒃᑐᓂᑦ, ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ ᐊᒻᒪᓗ ᐃᙱᖅᑎᓂᑦ 12-ᓂᒃ ᑲᑎᓐᓂᖃᖅᑎᓪᓗᒋᑦ ᑲᓇᑕᓕᒫᒥᑦ. ᑲᑎᓐᓂᖃᖅᑎᓪᓗᒋᑦ ᐋᖅᑭᒃᓱᖅᑕᐅᓚᐅᖅᑐᑦ ᑕᒡᕘᓇ ᓄᓇᖃᖅᑳᖅᓯᒪᔪᓄᑦ ᐱᕙᓪᓕᐊᑎᑦᑎᓂᕐᒧᑦ ᑐᑦᑕᕐᕕᖓᓄᑦ (ILDII) ᐱᓕᕆᔨᖃᖅᖢᑎᒃ ᓄᓇᖃᖅᑳᖅᓯᒪᔪᓂᒃ ᐅᖃᖅᑎᓂᒃ ᐊᒻᒪᓗ ᐊᐅᓚᑦᑎᔨᓂᑦ. ᐅᖃᓪᓚᖃᑎᒌᓐᓂᕐᒧᑦ ᒪᓕᒃᑕᐅᔪᒃᓴᒥᒃ ᐊᑐᐃᓐᓇᐅᑎᑦᑎᓚᐅᖅᑐᑦ ᐱᖃᑕᐅᔪᓕᒫᓄᑦ ᐊᐱᖅᑯᑎᑕᖃᖅᖢᓂ ᖃᓄᖅ ᑲᒥᓴᐅᔪᖅ ᐱᓕᕆᖃᑎᖃᕈᓐᓇᕋᔭᕐᒪᖔᖅ ᐊᑑᑎᖃᑦᑎᐊᖅᑐᒃᑯᑦ ᐊᒥᓱᓛᓂᒃ ᓄᓇᖃᖅᑳᖅᓯᒪᔪᓂᑦ ᓄᓇᓕᖕᓂᑦ ᐊᔪᙱᓐᓂᓕᒫᖏᓐᓂᒃ. ᓄᓇᖃᖅᑳᖅᓯᒪᔪᑦ ᑐᓴᖅᓴᐅᕙᒃᑐᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ ᐅᖃᐅᓯᖃᕈᔭᐅᓚᐅᕐᒥᔪᑦ ᐃᓱᒪᒋᔭᒥᓂᒃ ᐊᒃᓱᕉᑕᐅᔪᓂᒃ ᐊᒻᒪᓗ ᐱᕕᖃᕐᓂᐅᔪᓂᑦ ᑲᒪᒋᔭᐅᒋᐊᓕᖕᓂᒃ ᓄᑖᖑᔪᒥᑦ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᒧᑦ.
ᐃᓱᒪᒋᔭᐅᓚᐅᖅᑐᑦ ᑐᓴᖅᑕᐅᒐᔪᖃᑦᑕᓚᐅᖅᑐᑦ ᑲᑎᓐᓂᖃᖅᑎᓪᓗᒋᑦ ᓇᐃᓈᖅᑕᐅᓯᒪᔪᑦ ᐊᑖᓂ. ᓇᓗᓇᐃᖅᓯᒪᑦᑎᐊᖅᑐᒧᑦ ᑐᑭᓯᐅᒪᓂᕐᒥᑦ ᐃᓱᒪᒋᔭᐅᔪᓂᒃ ᓴᖅᑭᑕᐅᔪᓂᒃ ᐱᖃᑕᐅᔪᓄᑦ, ᐅᓂᒃᑳᓕᐊᖑᓯᒪᔪᖅ ᐃᓗᐃᑦᑑᓪᓗᓂ ᑕᑯᒋᐊᕐᓗᒍ ᐅᕙᓂ .
ᐱᖃᑕᐅᓚᐅᖅᑐᑦ ᐊᑑᑎᖃᑦᑎᐊᖅᑐᓂᑦ ᐅᖃᐅᓯᒃᓴᕋᓚᐅᖅᑐᑦ ᖃᓄᖅ ᑖᒃᑯᐊ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᖃᐅᔨᒪᒋᐊᑦᑎᐊᕈᓐᓇᕋᔭᕐᒪᖔᑦ ᓄᑖᖑᔪᒥᑦ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᒥᑦ ᑲᔪᓯᑎᑕᐅᒐᔭᕐᒪᖔᖅ ᓈᒻᒪᒃᑐᒃᑯᑦ ᐊᒻᒪᓗ ᐊᑐᐃᓐᓇᐅᑎᑕᐅᑦᑎᐊᖅᑐᒃᑯᑦ. ᐅᖃᐅᓯᖃᓪᓚᕆᓚᐅᖅᑐᑦ ᐱᒻᒪᕆᐅᓂᖓᓂ ᐃᑉᐱᒍᓱᑦᑎᐊᕆᐊᖃᕐᓂᕐᒥᑦ ᐅᖃᐅᓯᒃᑯᑦ ᐱᖅᑯᓯᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐱᖃᑕᐅᑎᑦᑎᓗᑎ ᐅᐸᒍᑎᓯᒪᓗᑎ ᐅᖃᖃᑎᖃᕐᓂᕐᒥᑦ ᑕᐃᒪᐃᒋᐊᖃᓕᕋᐃᑉᐸ. ᐅᐸᒍᑎᓯᒪᓚᐅᖅᑐᑦ ᓇᓗᓇᐃᖅᓯᓚᐅᕐᒥᔪᑦ ᐱᒻᒪᕆᐅᓂᖓᓂ ᓄᐊᑦᑎᓂᕐᒥᑦ ᐃᓱᒪᒋᔭᐅᔪᓂᒃ ᐊᔾᔨᒌᙱᑦᑐᓂᑦ ᓄᓇᓕᖕᓂᑦ ᐊᒻᒪᓗ ᐃᓕᓴᖅᓯᓂᕐᒥᑦ ᐊᔾᔨᐅᙱᑦᑐᓂᒃ ᑲᑎᙵᐅᖅᑐᓂᒃ ᐊᓪᓚᓂ, ᐃᓄᖕᓂᒃ ᐊᒻᒪᓗ ᐊᓪᓚᖓᔪᓂᑦ.
ᐅᖃᖃᑎᖃᕐᓃᑦ ᖃᐅᔨᒪᒋᐊᕆᐊᓖᑦ ᐊᑐᖅᓯᒪᔪᑐᖃᕐᓂᑦ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᑲᔪᓯᑎᑕᐅᓗᓂᓗ ᐃᓕᖅᑯᓯᕐᒥᑦ ᐅᔾᔨᖅᓱᔾᔫᒥᓂᒃᑯᑦ. ᐱᖃᑕᐅᑎᑦᑎᓂᕐᒥᑦ ᓈᒻᒪᒃᑐᓂᑦ ᐊᑐᐊᒐᕐᒧᑦ ᖃᓄᐃᓐᓂᐅᖃᑦᑕᖅᓯᒪᔪᓂᑦ ᑐᑭᓯᒋᐊᕈᑎᓂᑦ ᐊᒻᒪᓗ ᐃᓕᓴᖅᓯᓂᕐᒥᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐱᒻᒪᕆᐅᓂᕋᖅᑕᐅᓚᐅᖅᑐᖅ ᐊᑑᑎᖃᑦᑎᐊᖅᑐᒧᑦ ᐅᖃᖃᑎᒌᓐᓂᐅᔪᒧᑦ, ᐃᓱᒪᒋᔭᐅᔪᓪᓗ ᑖᒃᑯᓄᖓ ᐃᓐᓇᕐᓄᑦ ᒪᒃᑯᒃᑐᓄᓪᓗ ᐱᔭᐅᒍᒪᓚᐅᕐᒥᔪᑦ. ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᕐᒥᔪᑦ ᐱᒻᒪᕆᐅᓂᖓᓂ ᒪᓕᑦᑎᐊᓂᕐᒥᑦ ᐊᑐᕆᐊᓕᖕᓂᒃ ᐊᒻᒪᓗ ᖃᐅᔨᒪᑦᑎᐊᕐᓂᕐᒥᑦ ᐊᑭᓖᖃᑦᑕᓂᕐᒥᑦ ᓄᓇᖃᖅᑳᖅᓯᒪᔪᑦ ᐱᖃᑕᐅᓂᕆᔭᖏᓐᓄᑦ, ᖃᐅᔨᒪᓂᖏᓐᓄᑦ ᐊᒻᒪᓗ ᐊᔪᙱᑕᒥᓄᑦ.
ᐱᒻᒪᕆᐅᓂᖓ ᑐᑭᓯᐅᒪᓂᕐᒥᑦ ᑐᓴᖅᓴᐅᑎᑦᑎᓂᕐᒧᑦ ᐱᔭᐅᔭᕆᐊᓕᖕᓂᒃ ᓄᓇᖃᖅᑳᖅᓯᒪᔪᓄᑦ ᓄᓇᓕᕋᓛᓐᓂᑦᑐᓂ ᓄᓇᓕᐸᐅᔭᓐᓃᑦᑐᓂᓪᓗ, ᐅᖃᐅᓯᐅᓪᓚᕆᓚᐅᖅᑐᖅ ᑲᑎᓐᓂᐅᓚᐅᖅᑐᓂᑦ. ᖃᐅᔨᒪᑦᑎᐊᕆᐊᕐᓂᕐᒥᑦ ᖁᑦᑎᓂᖅᐹᒥ ᐱᖃᑕᐅᑎᑦᑎᓗᑎ, ᐊᔾᔨᒌᙱᑦᑐᓂᑦ ᐆᒃᑑᑎᓂᒃ ᐊᑐᖁᔨᓚᐅᖅᑐᑦ, ᐃᓚᒋᔭᐅᓪᓗᓂ ᐃᓄᓕᒫᓄᑦ ᑐᓴᕋᒃᓴᐅᔪᓂᑦ ᓄᓇᓖᑦ ᓈᓚᐅᑎᖏᑎᒍᑦ ᐊᒻᒪᓗ ᓄᓇᓕᖕᓂ ᑕᓚᕕᓴᒃᑯᑦ ᐊᒻᒪᓗ ᖃᕋᓴᐅᔭᒃᑯᑦ, ᐅᖃᖃᑎᖃᓪᓚᕆᓗᑎᓗ ᓄᓇᓖᑦ ᓯᕗᓕᖅᑎᖏᓐᓂᒃ. ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐅᖃᖃᑎᒌᓐᓂᐅᔪᑦ ᐊᔾᔨᒌᓗᑎᑦ ᐊᒻᒪᓗ ᑐᙵᕕᖃᕐᓗᑎ ᐋᔩᖃᑎᒌᓐᓂᕐᒧᑦ.
ᐱᖃᑕᐅᓚᐅᖅᑐᑦ ᖁᔭᓕᓂᖃᓚᐅᖅᑐᑦ ᐋᖅᑭᒃᓱᖅᓯᒪᓂᖏᓐᓄᑦ ᑲᑎᖃᑎᒌᓵᓕᓚᐅᕐᓂᖏᓐᓄᑦ, ᐃᒃᐱᒍᓱᑦᑎᐊᓂᕋᐃᓪᓗᑎᒃ ᓄᓇᖃᖅᑳᖅᓯᒪᔪᑦ ᐱᖅᑯᓯᖏᓐᓂᒃ. ᖁᔭᓕᓂᖃᓚᐅᖅᑐᑦ ᑲᑎᓐᓂᐅᔪᑦ ᐋᖅᑭᒃᓱᖅᓯᒪᓚᐅᕐᓂᖏᓐᓄᑦ ᐊᒻᒪᓗ ᐊᐅᓚᑕᐅᓪᓗᑎ ᓄᓇᖃᖅᑳᖅᓯᒪᔪᓄᑦ ᐱᓕᕆᔨᓄᑦ.
ᑐᓴᓚᐅᖅᑐᒍᑦ ᖃᓄᖅ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᐊᓂᒍᐃᔪᓐᓇᕐᒪᖔᑦ ᒪᑭᒪᒃᑲᓐᓂᓕᕐᓗᑎ ᐊᒃᓱᕈᖅᖢᑎᒡᓗ ᑲᔪᓯᓂᖃᖅᑎᐊᕈᒪᓪᓗᑎᒃ ᑐᓴᐅᒪᔾᔪᑎᓄᑦ ᐊᒻᒪᓗ ᑐᓴᖅᑕᐅᑎᑦᑎᓂᕐᒧᑦ ᐱᓕᕆᕝᕕᖕᓂᒃ. ᓄᓇᖃᖅᑳᖅᓯᒪᔪᑦ ᐊᔪᙱᓐᓂᖏᑦ ᑐᓴᖅᓴᐅᔪᒃᑯᑦ ᐊᒻᒪᓗ ᑐᓴᖅᓴᐅᔪᒃᑯᑦ ᑕᐅᑐᓐᓂᒃᑯᓪᓗ ᓴᖅᑭᑕᐅᓯᒪᔪᓂᑦ ᐊᒻᒪᓗ ᓴᓇᓂᕐᒥᑦ ᐊᒥᓲᕗᑦ. ᐱᓕᕆᐊᒃᓴᕆᔭᖓ ᓄᓇᖃᖅᑳᖅᓯᒪᔪᓄᑦ ᓈᓚᐅᑏᑦ ᐃᑲᔪᖅᓱᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᓂᔾᔭᐅᓯᔭᖅᑎᓂᑦ ᐊᒻᒪᓗ ᐃᑲᔪᕐᓂᕐᒥᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᐆᒻᒪᒃᑎᑦᑎᓗᑎ ᐅᖃᐅᓯᕐᒥᑦ ᐊᒻᒪᓗ ᐃᓕᖅᑯᓯᕐᒥᓂᑦ ᓇᓗᓇᐃᖅᑕᐅᓚᐅᖅᑐᖅ ᑲᔪᓯᓂᖃᑦᑎᐊᖅᖢᓂ. ᐃᑉᐱᒍᓱᑦᑎᐊᕐᓂᕐᒥᑦ ᑲᔪᓯᓂᖃᑦᑎᐊᖅᑐᓂ ᓄᓇᖃᖅᑳᖅᓯᒪᔪᓂᑦ ᓂᔾᔭᐅᓯᔭᖅᑏᑦ ᓄᓇᓕᖏᓐᓂᒃ, ᓲᕐᓗ ᑕᐃᖕᓇ ᒫᓂᑑᐸᒦᑦᑐᒥ, ᐃᓕᓴᕆᔭᐅᓚᐅᖅᐳᖅ ᐱᓕᕆᐊᖃᓪᓗᐊᑕᓚᐅᕐᓂᖓᓂ ᐃᓕᓴᕆᔭᐅᓂᕐᒧᑦ ᓄᓇᖃᖅᑳᖅᓯᒪᔪᓂᑦ ᐃᙱᖅᑎᓂᑦ ᓂᔾᔭᐅᓯᔭᖅᐸᒃᑕᖏᓐᓂᓪᓗ. ᓄᓇᖃᖅᑳᖅᓯᒪᔪᓄᑦ ᓴᖅᑭᑎᑦᑎᓂᕐᒧᑦ ᐊᒡᓚᒡᕕᖓ ᓇᓗᓇᐃᖅᑕᐅᓚᐅᖅᑐᖅ ᐱᒻᒪᕆᐅᓪᓗᓂ ᐱᒋᐊᕈᑕᐅᓪᓗᓂ ᐃᑲᔪᖅᓱᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐅᓂᒃᑳᕐᓂᕐᒧᑦ ᑕᕐᕆᔭᐅᓯᐅᕐᓂᒃᑯᑦ.
ᐱᖃᑕᐅᓚᐅᖅᑐᑦ ᐅᐱᒍᓱᓚᐅᕐᒥᔪᑦ ᓴᖅᑭᑕᐅᓚᐅᕐᓂᖓᓂ ᓄᓇᖃᖅᑳᖅᓯᒪᔪᓄᑦ ᑕᓚᕕᓴᓕᕆᔨᒃᑯᑦ (APTN), ᓂᐱᑖᖅᑎᑦᑎᕗᖅ ᓄᓇᖃᖅᑳᖅᓯᒪᔪᓄᑦ ᓴᖅᑭᑎᑦᑎᔨᓄᑦ. ᓰᐲᓰ (CBC) ᐅᑭᐅᖅᑕᖅᑐᒥ ᓄᓇᓕᖕᒨᖓᓂᖓᖅᑕᐅᓚᐅᕐᒥᔪᑦ, ᑕᐅᑐᒃᑕᐅᓪᓗᑎᓗ ᑲᔪᓯᓂᖃᑦᑎᐊᖅᖢᑎᒃ ᐆᒃᑑᑎᒋᔭᐅᓪᓗᑎᒃ ᐃᓚᖏᓐᓄᑦ ᐱᖃᑕᐅᓚᐅᖅᑐᓄᑦ. ᐊᓯᖏᑦ ᐅᖃᐅᓯᖃᓚᐅᖅᑐᑦ ᓄᓇᖃᖅᑳᖅᓯᒪᙱᑦᑐᓂᑦ ᑲᑐᔾᔨᖃᑎᒌᓂᑦ ᐃᓱᒪᒋᔭᐅᔪᑦ ᐃᑲᔪᖅᑎᒋᔭᐅᓪᓗᑎ ᐊᒻᒪᓗ ᐱᓕᕆᐊᖃᐃᓐᓇᐅᔭᖅᑐᑦ ᐃᑲᔪᖅᓱᓂᕐᒧᑦ ᓴᖅᑭᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓂᙶᖅᑐᓂᒃ.
ᐱᖃᑕᐅᓚᐅᖅᑐᑦ ᐅᖃᐅᓯᒃᓴᖃᓚᐅᖅᑐᑦ ᐊᔾᔨᒌᙱᑦᑐᓄᑦ ᐃᓱᒫᓘᑕᐅᔪᓄᑦ ᓄᖅᑲᖅᑎᑦᑎᓯᒪᔪᓂᑦ ᓄᓇᖃᖅᑳᖅᓯᒪᔪᑦ ᑐᓴᖅᓴᐅᕙᒃᑐᓂᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᓂᑦ ᐱᖃᑕᐅᑦᑎᐊᕈᓐᓇᕐᓂᖏᓐᓂᒃ ᓇᐅᒃᑲᓕᒪᖅ ᑐᓴᖅᓴᐅᑎᑦᑎᓂᕐᒧᑦ ᐱᓕᕆᕝᕕᐅᔪᒥᑦ ᑲᓇᑕᒥ.
ᓈᓚᐅᑎᒃᑯᑦ ᑐᓴᖅᓴᐅᕙᒃᑐᑦ: ᓄᓇᖃᖅᑳᖅᓯᒪᔪᑦ ᓈᓚᐅᑎᖏᑦ ᐱᒻᒪᕆᐅᕗᑦ ᑐᓴᐅᒪᖃᑎᒌᓐᓂᕐᒧᑦ ᓄᓇᓕᖏᓐᓂᒃ, ᑭᓯᐊᓂ ᐅᓄᖅᑐᑦ ᑮᓇᐅᔭᑭᓗᐊᖅᐸᒃᑐᑦ. ᐅᓄᖅᑐᑦ ᓂᐅᕐᕈᑎᖃᕐᓂᕐᒧᑦ ᑕᑯᒃᓴᐅᑎᑦᑎᔪᒪᒐᔭᖅᑐᑦ ᑭᓯᐊᓂ ᐱᕕᖃᕐᓇᓗᐊᙱᒻᒪᑦ. ᒫᓐᓇᐅᔪᖅ ᐊᑐᐊᒐᐅᔪᖅ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᓇᓗᓇᐃᖅᓯᕗᖅ ᒪᕐᕉᖕᓂᒃ ᓈᓚᐅᑏᖕᓂᒃ (ᐃᓚᖓ A ᐊᒻᒪᓗ ᐃᓚᖓ B), ᑕᒪᒃᑮᒃ ᓇᖕᒥᓂᕆᔭᐅᒋᐊᓖᑦ ᐊᐅᓚᑕᐅᓗᑎᓗ ᑮᓇᐅᔾᔭᕋᓱᐊᙱᑦᑐᓄᑦ ᑲᑐᔾᔨᖃᑎᒌᓄᑦ, ᐃᓚᖏᑦ ᐅᐸᒍᑎᓯᒪᔪᑦ ᐅᖃᓚᐅᖅᑐᑦ ᐱᑕᖃᕆᐊᖃᕐᓂᖓᓂ ᐊᓯᒃᑲᓂᖓᓂ ᐃᓚᖓᓂ ᑮᓇᐅᔾᔭᕈᑕᐅᔪᓐᓇᖅᑐᒥ ᓂᐅᕐᕈᑎᖃᕐᓂᕐᒧᑦ ᓈᓚᐅᑎᓂᑦ. ᑕᐃᒪᐃᒻᒪᑦ, ᐊᒥᓱᑦ ᐃᓱᒪᒋᔭᖃᓚᐅᖅᑐᑦ ᓄᓇᖃᖅᑳᖅᓯᒪᔪᓄᑦ ᓈᓚᐅᑎᖏᑦ ᐃᓱᒪᒋᔭᐅᒋᐊᖃᙱᑦᑐᑦ ᐅᕝᕙᓘᓐᓃᑦ ᐊᐅᓚᑕᐅᙱᓪᓗᑎ ᐊᖏᔪᑎᑐᑦ ᑐᓴᐅᒪᔾᔪᑎᓄᑦ ᑐᑦᑕᕐᕕᖕᓄᑦ, ᐅᕝᕙᓘᓐᓃᑦ ᑕᐃᒫᔅᓴᐃᓐᓇᖅ ᒪᓕᒋᐊᖃᙱᓪᓗᑎ ᒪᓕᒐᐅᔪᓂᑦ.
ᑐᓴᖅᓴᐅᑎᑦᑎᓂᕐᒧᑦ ᒪᑭᒪᔾᔪᑏᑦ: ᐱᑕᖃᕆᐊᖃᕐᓂᖓ ᒪᑭᒪᔾᔪᑎᑦᑎᐊᕙᐅᓂᖅᓴᓂᑦ ᐊᒻᒪᓗ ᓱᓇᒃᑯᑖᓂᑦ ᐅᖃᐅᓯᐅᑲᑕᐃᓐᓇᓚᐅᖅᑐᖅ. ᐱᖃᑕᐅᓚᐅᖅᑐᑦ ᐅᖃᐅᓯᖃᐃᓐᓇᓚᐅᖅᑐᑦ ᓱᓇᒃᑯᑖᑦ ᓱᕋᖃᑦᑕᕐᓂᖏᓐᓂᒃ ᐋᖅᑭᒃᑕᐅᓴᕋᐃᒍᓐᓇᕋᑎᓗ ᐅᖓᓯᑦᑐᒦᓐᓂᖏᓐᓄᑦ ᐊᒻᒪᓗ ᐱᓕᒻᒪᒃᓴᖅᓯᒪᙱᑦᑐᓂᑦ ᐃᖅᑲᓇᐃᔭᖅᑎᓂᑦ. ᑕᓚᕕᓴᒃᑯᑦ ᑐᓴᖅᓴᐅᑎᑦᑎᓂᕐᒧᑦ ᖃᕋᔭᐅᔭᓕᕆᔾᔪᑏᑦ ᐅᑭᐅᖅᑕᖅᑑᑉ ᓄᓇᓕᖏᓐᓂᒃ ᐅᖃᐅᓯᐅᓚᐅᖅᑐᖅ ᐱᑕᖃᐅᓕᕐᓂᖏᓐᓂᒃ. ᓄᑖᙳᖅᑎᖅᓯᒪᔪᑦ ᐊᒻᒪᓗ ᐊᑭᑭᓐᓂᖅᓴᐅᔪᑦ ᖃᕋᔭᐅᔭᒃᑰᕈᑎᓂᑦ ᒪᑭᒪᔾᔪᑎᒃᓴᓂᑦ ᐱᑕᖃᕆᐊᓕᒃ, ᖃᕋᓴᐅᔭᒃᑰᖅᑐᓂᑦ ᐱᑕᖃᕐᓂᖅᓴᐅᓕᕐᒪᑦ ᑐᓴᖅᓴᐅᔪᒃᑯᑦ ᐊᒻᒪᓗ ᑐᓴᖅᓴᐅᔪᒃᑯᑦ ᑕᐅᑐᓐᓂᒃᑯᓪᓗ ᑕᑯᒃᓴᐅᔪᓂᑦ, ᐃᓕᓐᓂᐊᕐᓂᕐᒧᑦ, ᐊᑐᐃᓐᓇᖃᕐᕕᐅᓂᕐᒥᓪᓗ ᐱᒻᒪᕆᐅᔪᓂᑦ ᑐᑭᓯᒋᐊᕈᑎᓂᑦ.
ᓂᔾᔭᐅᓯᔭᖅᑐᓂᒃ ᐊᒻᒪᓗ ᑐᓴᖅᓴᐅᓂᒃᑯᑦ ᑕᐅᑐᓐᓂᒃᑯᓪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ: ᓄᓇᖃᖅᑳᖅᓯᒪᔪᑦ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ ᐊᔾᔨᒌᐸᓗᒃᑐᓂᑦ ᐃᓱᒫᓘᑎᒋᔭᒥᓂᒃ ᐅᖃᐅᓯᖃᓚᐅᖅᑐᑦ. ᑭᒡᒐᖅᑐᖅᑕᐅᑦᑎᐊᖅᑎᓪᓗᒋᑦ ᓄᓇᖃᖅᑳᖅᓯᒪᔪᓄᑦ ᑐᓴᐅᒪᔾᔪᑎᓄᑦ, ᓇᓗᓇᐃᖅᓯᓚᐅᖅᑐᑦ ᐃᓄᒋᐊᓐᓂᖅᓴᓄᑦ ᐅᖓᓯᑦᑐᒦᑦᑐᓄᑦ ᑐᓴᖅᑕᐅᒋᐊᖃᕐᓂᖏᓐᓂᒃ. ᑕᐃᒪᐃᓕᐅᕐᓂᕐᒧᑦ, ᐃᓱᒪᓚᐅᖅᑐᑦ ᐱᓕᕆᔨᓪᓗᐊᑕᑦ ᓈᓚᐅᑎᒃᑯᑦ ᐊᒻᒪᓗ ᑕᓚᕕᓴᒃᑯᑦ ᑐᓴᖅᓴᐅᕙᒃᑐᑦ ᓴᖅᑭᔮᖅᑎᑦᑎᒋᐊᓖᑦ ᐋᖅᑭᒃᓯᒪᔪᒥᑦ ᐳᓴᓐᑎᒥᒃ ᓄᓇᖃᖅᑳᖅᓯᒪᔪᓂᑦ ᐅᓗᓕᒃᓴᖏᓐᓄᑦ ᐋᖅᑭᒃᓱᐃᔨᓄᑦ. ᑕᒪᓐᓇ ᐱᑕᖃᕆᐊᖃᕐᓂᖓ ᓄᓇᖃᖅᑳᖅᓯᒪᔪᑦ ᐅᓂᒃᑳᓕᐊᖏᓐᓂᒃ ᑐᓴᖅᑕᐅᒋᐊᖃᕐᓂᖏᓐᓂᒃ ᓄᓇᖃᖅᑳᖅᓯᒪᙱᑦᑐᓄᑦ ᑐᕌᖓᖃᓯᐅᑎᒋᕗᖅ ᖃᕋᓴᐅᔭᒃᑰᖓᔪᓂᑦ. ᐅᐸᒍᑎᓯᒪᓚᐅᖅᑐᑦ ᐅᖃᐅᓯᖃᓚᐅᕐᒥᔪᑦ ᐊᒥᒐᓗᐊᕐᓂᖏᓐᓂᒃ ᑮᓇᐅᔭᖃᖅᑎᑕᐅᓂᖏᓐᓄᑦ ᐊᒻᒪᓗ ᑮᓇᐅᔭᖃᖅᑎᐅᓂᖅ ᓄᖅᑲᖓᕈᑕᐅᓪᓗᑎ ᓴᖅᑮᓂᕐᒧᑦ ᐊᒻᒪᓗ ᓇᑲᑎᕆᓂᕐᒧᑦ ᓄᓇᖃᖅᑳᖅᓯᒪᔪᓅᖓᔪᓂᑦ.
ᐱᓕᕆᔨᓪᓗᐊᑕᑦ ᑐᓴᖅᑕᐅᑎᑦᑎᓂᕐᒧᑦ ᐱᓕᕆᐊᒃᓴᖃᒻᒪᕆᒃᑐᑦ: ᐱᓕᕆᒋᐊᓕᖓ ᐱᓕᕆᓪᓗᐊᑕᐅᔪᖅ ᑐᓴᐅᒪᔾᔪᑎᓄᑦ ᐃᑲᔪᖅᓱᓂᕐᒧᑦ ᐊᒻᒪᓗ ᑕᑯᒋᐊᕐᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᓴᖅᑭᑕᐅᒐᔪᓚᐅᖅᑐᖅ ᐅᖃᖃᑎᖃᖃᑦᑕᖅᑎᓪᓗᒋᑦ. ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᑕᖃᕆᐊᖃᕐᓂᖓᓂ ᓄᓇᖃᖅᑳᖅᓯᒪᙱᑦᑐᓂᑦ ᑐᓴᖅᓴᐅᕙᒃᑐᓂᑦ ᐃᓕᓴᖅᓯᔪᓐᓇᕐᓗᑎ ᐱᔭᒃᓴᕆᔭᒥᓂᒃ ᑎᑭᐅᒪᓂᕐᒥᑦ ᑲᓇᑕᐅᑉ ᐊᑐᕆᐊᖃᖅᑕᖏᓐᓂᒃ ᓄᓇᖃᖅᑳᖅᓯᒪᔪᓄᑦ. ᐅᓄᖅᑐᑦ ᐃᓱᒪᓚᐅᖅᑐᑦ ᐊᑐᕆᐊᖃᓪᓚᕆᒃᑐᖅ ᒪᓕᒋᐊᓖᑦ ᑐᓴᖅᓴᐅᑎᑦᑎᓂᕐᒧᑦ ᖃᔅᓯ ᐳᓴᓐᑎᒥᒃ ᓄᓇᖃᖅᑳᖅᓯᒪᔪᓂᙶᖅᑐᓂᑦ, ᓴᖅᑭᑕᐅᓗᑎ ᑖᒃᑯᓄᖓᓅᖓᓗᑎᓗ ᓄᓇᖃᖅᑳᖅᓯᒪᔪᓄᑦ, ᐊᑐᖅᑕᐅᖔᕈᒪᒐᔭᖅᑐᑦ “ᑲᔪᖏᖅᓴᐅᑎᐅᓗᑎ”. ᐅᐸᒍᑎᓯᒪᔪᑦ ᓇᓗᓇᐃᖅᓯᓚᐅᕐᒥᔪᑦ ᓄᓇᖃᖅᑳᖅᓯᒪᔪᓂᑦ ᑭᒡᒐᖅᑐᐃᓂᖃᓐᓂᖅᓴᐅᒋᐊᓖᑦ ᐃᖏᕐᕋᑎᑦᑎᓂᕐᒧᑦ ᐊᒻᒪᓗ ᐊᐅᓚᑦᑎᓂᕐᒧᑦ ᓄᓇᖃᖅᑳᖅᓯᒪᙱᑦᑐᓄᑦ ᑐᓴᖅᓴᐅᕙᒃᑐᓂᑦ. ᐃᑲᔪᖅᓱᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᑐᓴᖅᓴᐅᕙᒃᑐᓂᑦ ᐃᓕᓐᓂᐊᖅᑎᓂᑦ ᐃᓕᓐᓂᐊᕈᓯᐊᕐᓂᒃᑯᑦ ᐊᒻᒪᓗ ᐱᓕᒻᒪᒃᓴᕐᓂᒃᑯᑦ ᑕᑯᔭᐅᓚᐅᕐᒥᔪᖅ ᐃᑲᔫᑎᖃᕈᓐᓇᕐᓂᖓᓂ ᐱᕙᓪᓕᐊᑎᑦᑎᓂᕐᒧᑦ ᓄᑖᒥ ᐊᒻᒪᓗ ᓴᖅᑭᐸᓪᓕᐊᔪᓂᑦ ᓄᓇᖃᖅᑳᖅᓯᒪᔪᓂᑦ ᐊᔪᙱᓐᓂᐅᔪᓂᑦ.
ᐱᖃᑕᐅᓚᐅᖅᑐᑦ ᓴᖅᑮᓚᐅᖅᑐᑦ ᐃᓱᒫᓘᑎᒋᔭᖏᓐᓂᒃ ᓄᓇᖃᖅᑳᖅᓯᒪᙱᑦᑐᑦ ᑲᑐᔾᔨᖃᑎᒌᖏᓐᓂᒃ ᐃᓄᓕᒫᓅᖓᔪᓂᑦ ᑮᓇᐅᔭᖃᖅᑎᑕᐅᓂᖏᓐᓂᒃ ᓴᖅᑮᓂᕐᒧᑦ ᐅᕝᕙᓘᓐᓃᑦ ᓇᑲᑎᕆᓂᕐᒧᑦ ᓄᓇᖃᖅᑳᖅᓯᒪᔪᓂᙶᖅᑐᓂᑦ. ᐅᖃᐅᓯᖃᓚᐅᖅᑐᑦ ᐱᑕᖃᓕᕆᐊᖃᕐᓂᖓᓂ ᐃᓕᓯᒪᔪᓂᑦ ᖃᐅᔨᒪᑦᑎᐊᕆᐊᕐᓂᕐᒥᑦ ᑐᓴᖅᓴᐅᔪᒃᓴᓕᐊᖑᔪᑦ ᓴᓇᔭᐅᔪᓗᑎᒃ ᓄᓇᖃᖅᑳᖅᓯᒪᔪᓄᑦ ᐋᖅᑭᒃᓱᐃᓂᐊᖅᑎᓪᓗᒋᑦ ᓄᓇᖃᖅᑳᖅᓯᒪᔪᓅᖓᔪᓂᑦ ᐱᓕᕆᔨᓪᓗᐊᑕᕐᓄᑦ ᑐᓴᖅᓴᐅᕙᒃᑐᓂᑦ.
ᐱᖃᑕᐅᓚᐅᖅᑐᑦ ᐊᔾᔨᒌᑦᑐᐊᓗᒻᒥ ᑕᐅᑐᑦᑕᐅᓂᕆᔭᖏᑦ ᐱᐅᙱᑦᑐᒃᑯᑦ ᓄᓇᖃᖅᑳᖅᓯᒪᔪᓄᑦ ᓴᖅᑭᑕᐅᒐᔪᓚᐅᖅᑐᑦ ᑐᓴᐅᒪᔾᔪᑎᓄᑦ, ᐊᒻᒪᓗ ᑖᒃᑯᐊᓗ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ ᐊᒻᒪᓗ ᐅᖃᐅᓯᖏᑦ ᑕᑯᒃᓴᐅᓂᖅᓴᐅᒋᐊᖃᖅᑐᑦ. ᐅᓄᖅᑐᑦ ᐅᖃᐅᓯᖃᓚᐅᖅᑐᑦ ᐱᒻᒪᕆᐅᓂᖓᓂ ᓴᖅᑭᔮᖅᑎᑦᑎᓂᕐᒥᑦ ᐃᓕᖅᑯᓯᕐᒥᑦ ᐅᔾᔨᕈᓱᓕᖅᑎᑦᑎᓂᕐᒥᑦ ᑕᐃᑲᓂᓕᒫᖅ ᑐᓴᖅᓴᐅᑎᑦᑎᓂᕐᒧᑦ ᐱᓕᕆᔾᔪᓯᐅᔪᒥ. ᐱᑕᖃᕐᓗᓂ ᓄᓇᖃᖅᑳᖅᓯᒪᔪᓂᑦ ᐃᓕᖅᑯᓯᕐᒥᑦ ᖃᐅᔨᒪᑦᑎᐊᖅᑐᓂᑦ ᓈᓚᐅᑎᖃᕐᕕᖕᒥᑦ ᐅᕝᕙᓘᓐᓃᑦ ᑕᕐᕆᔭᐅᓯᕐᕕᖕᒥᑦ ᐊᑑᑎᖃᕋᔭᖅᐳᖅ ᐃᓗᓕᖏᑦ ᓈᒻᒪᒃᑲᓗᐊᕐᒪᖔᑦ ᐊᒻᒪᓗ ᑐᕌᖓᑦᑎᐊᕋᓗᐊᕐᒪᖔᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓄᑦ ᐱᖅᑯᓯᖏᓐᓄᓪᓗ. ᐅᐸᒍᑎᓯᒪᓚᐅᖅᑐᑦ ᐅᖃᐅᓯᖃᓚᐅᕐᒥᔪᑦ ᐱᑕᖃᕆᐊᖃᓪᓚᕆᓐᓂᖓᓂ ᑐᐊᕕᕐᓇᖅᑐᑦ ᖃᐅᔨᒃᑲᐃᕈᑕᐅᕙᒃᑐᑦ ᓴᖅᑭᑕᐅᕙᒻᒥᒡᓗᑎ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑎᒍᑦ.
ᑭᒡᒐᖅᑐᐃᓂᖏᑦ ᓄᓇᖃᖅᑳᖅᓯᒪᔪᓂᑦ ᐃᖅᑲᓇᐃᔭᖅᑐᓂᑦ ᐱᓕᕆᕝᕕᐅᔪᒥᑦ: ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐱᒻᒪᕆᐅᓂᖓᓂ ᐱᑕᖃᕐᓗᓂ ᓄᓇᖃᖅᑳᖅᓯᒪᔪᓄᑦ ᓈᓚᐅᑎᒃᑯᕕᖕᓂᑦ ᐃᖅᑲᓇᐃᔭᖅᑎᖃᕐᓗᑎ ᐊᒻᒪᓗ ᐊᐅᓚᑕᐅᓗᑎ ᓄᓇᓕᖕᒥᐅᖃᑎᖏᓐᓄᑦ. ᑭᓯᐊᓂ, ᓄᓇᖃᖅᑳᖅᓯᒪᔪᓂᑦ ᐃᖅᑲᓇᐃᔭᖅᑎᖃᒃᑲᓐᓂᕆᐊᓖᑦ ᑕᒪᐃᓐᓂᓕᒫᓐᓂᒃ ᑐᓴᖅᓴᐅᑎᑦᑎᓂᕐᒧᑦ ᐱᓕᕆᔾᔪᓯᐅᔪᒥ. ᐅᓄᕐᓂᖅᓴᓂᑦ ᓄᓇᖃᖅᑳᖅᓯᒪᔪᓂᑦ ᐱᖃᑕᐅᒋᐊᓖᑦ ᐃᓱᒪᓕᐅᕆᓂᕐᒧᑦ ᐱᓕᓂᐅᔪᓂᑦ, ᐱᓗᐊᙳᐊᖅᑐᒥ ᐋᖅᑭᒃᓱᐃᑎᓪᓗᒋᑦ ᑮᓇᐅᔭᖅᑎᒍᑦ ᑕᑯᒃᓴᐅᔪᓂᑦ ᐊᒻᒪᓗ ᐊᑐᕆᐊᓕᖕᓂᒃ ᐃᑲᔪᖅᓱᓂᕐᒧᑦ ᓴᖅᑭᓂᕐᒥᑦ ᓄᓇᖃᖅᑳᖅᓯᒪᔪᓂᙶᖅᑐᓂᒃ. ᐃᓚᖏᑦ ᐅᖃᓚᐅᖅᑐᑦ ᐱᓕᕆᔨᓪᓗᐊᑕᑦ ᑐᓴᖅᓴᐅᕙᒃᑐᑦ ᐱᑕᖃᕆᐊᖃᕐᓂᖓᓂ ᐅᖃᐅᓯᖃᕐᓂᕐᒧᑦ ᖃᔅᓯᓂᑦ ᓄᓇᖃᖅᑳᖅᓯᒪᔪᓂᑦ ᐃᓄᖕᓂᑦ ᐃᖅᑲᓇᐃᔭᖅᑎᑦᑎᖕᒪᖔᑦ. ᑐᓴᖅᓴᐅᕙᒃᑐᑦ ᐸᕐᓇᐅᑎᖃᑦᑎᐊᕆᐊᓖᑦ ᐃᖅᑲᓇᐃᔭᖅᑎᑖᕐᓂᕐᒧᑦ, ᐱᓕᒻᒪᒃᓴᐃᑎᑦᑎᓂᕐᒧᑦ ᐊᒻᒪᓗ ᐱᓯᒪᑦᑏᓐᓇᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐃᖅᑲᓇᐃᔭᖅᑎᓂᑦ.
ᑕᒪᐃᑎᒎᖓᔪᒥᑦ ᓇᓕᒧᒌᑎᑦᑎᓂᕐᒥᑦ: ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐊᑯᓂᓗᐊᕌᓗᒡᒎᖅ ᐊᔾᔨᒌᙱᓐᓂᐅᔪᓂᒃ ᐊᑐᐊᒐᕐᓂᒃ ᑐᕌᖓᓂᖃᕆᐊᓖᑦ ᓇᓕᒧᒌᓕᕐᓗᑎᒃ ᑖᒃᑯᐊ ᓄᓇᖃᖅᑳᖅᓯᒪᔪᑦ ᐃᙱᖅᑏᑦ, ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ ᐊᒻᒪᓗ ᑐᓴᖅᓴᐅᕙᒃᑐᑦ ᓇᓕᒧᒌᓗᑎᑦ ᓄᓇᖃᖅᑳᖅᓯᒪᙱᑦᑐᓂᑦ ᐱᓕᕆᔨᐅᖃᑎᖏᓐᓂᒃ ᓲᕐᓗ ᑮᓇᐅᔭᕐᓄᑦ, ᑕᑯᒃᓴᐅᕙᒃᑐᓂᑦ, ᐊᑐᐃᓐᓇᐅᖃᕐᓂᖏᑦ ᐅᓪᓗᒥᓯᐅᑎᓂᒃ ᖃᕋᓴᐅᔭᓕᕆᔾᔪᑎᓂᒃ ᐊᒻᒪᓗ ᒪᑭᒪᔾᔪᑎᒃᓴᓂᑦ.
ᑲᑎᖃᑎᖃᖅᓵᓕᓂᖅ ᐱᖃᑕᐅᓚᐅᖅᑐᓂᑦ ᐊᑐᐃᓐᓇᐅᑎᑦᑎᓚᐅᖅᑐᑦ ᐱᒻᒪᕆᐅᔪᓂᑦ ᐅᖃᐅᓯᒃᓴᓂᑦ ᐱᕕᖃᕐᓂᐅᔪᓂᑦ ᐱᐅᓯᕚᓪᓕᖅᑎᑦᑎᓂᕐᒧᑦ ᐊᒻᒪᓗ ᐋᖅᑭᒋᐊᖅᓯᓂᕐᒧᑦ ᑲᒪᒋᔭᖃᕐᓂᕐᒥᑦ ᖁᓛᓃᑦᑐᓂᑦ ᐊᑲᐅᙱᓕᐅᕈᑕᐅᔪᓂᑦ ᐅᖃᐅᓯᔪᓂᑦ.
ᐃᑲᔪᖅᓱᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᓈᓚᐅᑎᒃᑯᑦ ᑐᓴᖅᓴᐅᕙᒃᑐᓂᑦ: ᐱᖃᑕᐅᓚᐅᖅᑐᑦ ᐃᒃᐱᒋᔭᖃᓚᐅᖅᑐᑦ ᑮᓇᐅᔭᖃᕐᓂᖅᓴᐅᒋᐊᖃᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᓈᓚᐅᑎᒃᑯᕕᖏᑦ ᐱᔨᑦᑎᕋᑦᑎᐊᓂᖅᓴᐅᓂᐊᕐᒪᑕ ᓄᓇᓕᖏᓐᓂᒃ. ᑮᓇᐅᔭᖃᖅᑎᑦᑎᓂᕐᒥᑦ ᐱᓕᕆᔨᒻᒪᕆᖕᓂ ᑎᑭᑎᑦᑎᓂᐊᕐᒪᑕ ᓄᓇᓕᖏᓐᓄᑦ ᐱᓕᒻᒪᒃᓴᐃᑎᑦᑎᓂᕐᒧᑦ, ᐊᑭᓖᓂᕐᒧᓪᓗ ᓇᑲᑎᕆᔨᓂᑦ ᐅᖃᐅᓯᒃᑯᑦ ᓴᖅᑭᑕᐅᕙᑦᑐᓄᑦ, ᐃᑲᔪᕐᓂᖅᓴᐅᒐᔭᖅᑐᖅ ᐊᒥᓲᓂᖅᓴᓂᑦ ᐊᒻᒪᓗ ᐊᔾᔨᒌᙱᑦᑑᑎᓂᑦ ᐱᑕᖃᕐᓂᖅᓴᐅᓕᕐᓗᓂ.
ᐃᑲᔪᖅᓱᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐃᙱᖅᑎᓄᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᓄᑦ: ᓄᓇᖃᖅᑳᖅᓯᒪᔪᓄᑦ ᓂᔾᔭᐅᓯᔭᖅᑎᓄᑦ ᖃᐅᔨᔭᐅᓂᐊᕐᒪᑕ ᐃᓕᓴᕆᔭᐅᓗᑎᓗ, ᐃᓚᖏᑦ ᐅᖃᓚᐅᖅᑐᑦ ᖃᕋᓴᐅᔭᒃᑯᑦ ᑭᒃᑯᓕᒫᓄᑦ ᐊᑐᐃᓐᓇᐅᔪᒥ ᓄᐊᑦᑎᕕᖕᒥ ᓴᖅᑮᓗᑎ. ᐱᖃᑕᐅᓚᐅᖅᑐᑦ ᐃᒃᐱᒍᓱᓚᐅᕐᒥᔪᑦ ᐱᓕᕆᐊᖃᕐᓂᖅᓴᐅᒍᓐᓇᕐᓂᖏᓐᓂᒃ ᐃᔾᔪᐊᖅᑕᐅᔭᕆᐊᖃᖏᑦᑐᓂᑦ ᓄᐊᑦᑎᓯᒪᓂᕐᒥᑦ ᐃᑲᔪᕐᓂᖃᕋᔭᖅᑐᖅ ᓇᓗᓇᐃᖅᓯᓂᕐᒥᑦ ᐊᒻᒪᓗ ᐱᓯᒪᑦᑎᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᓂᔾᔭᐅᓯᔭᖅᑐᓂᑦ ᓂᓪᓕᐊᑎᑕᐅᕙᑦᑐᓂᑦ ᑐᓴᖅᓴᐅᕙᒃᑐᓕᒫᓄᑦ ᐃᙱᐅᓯᐅᖅᑎᐅᔪᑦ ᓈᒻᒪᒃᑐᒥ ᐊᑭᓕᖅᑕᐅᖃᑦᑕᕐᓂᐊᕐᒪᑕ. ᐃᓚᖏᑦ ᐃᒃᐱᒍᓱᓚᐅᖅᑐᑦ ᑖᒃᑯᐊ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᐃᑲᔪᕈᓐᓇᖅᑐᑦ ᓱᓕᓂᕋᐃᓗᑎ ᓈᓚᐅᑎᒃᑯᕕᑦ ᐊᑭᓖᖃᑦᑕᖅᓯᒪᓂᖏᓐᓂᒃ ᐃᔾᔪᐊᖅᑕᐅᔭᕆᐊᖃᖏᑦᑐᖅ ᐊᑭᓕᐅᑎᓂᑦ. ᐃᓕᓐᓂᐊᖅᑎᑦᑎᓂᕐᒥᑦ ᓂᔾᔭᐅᓯᔭᖅᑎᓄᑦ ᐃᑲᔫᑎᖃᕋᔭᕐᒥᔪᖅ ᑐᑭᓯᐅᒪᓂᕐᒧᑦ ᐃᔾᔪᐊᖅᑕᐅᔭᕆᐊᖃᖏᑦᑐᓄᑦ ᐊᑎᓕᐅᕐᓂᕐᒧᑦ ᐊᒻᒪᓗ ᓄᐊᑦᑎᓂᕐᒥᑦ.
ᐱᖃᑕᐅᓚᐅᖅᑐᑦ ᐃᒃᐱᒍᓱᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᐅᓂᒃᑳᖅᑏᑦ ᑲᔪᖏᖅᓱᖅᑕᐅᒋᐊᓖᑦ ᐱᓕᕆᖃᑎᒌᓐᓂᕐᒧᑦ ᐊᒃᓱᕈᖃᑦᑕᐅᑎᒋᐊᖃᙱᓪᓗᑎ ᐱᓇᓱᐊᕐᓂᕐᒧᑦ ᑭᒡᓕᖃᖅᑐᓂᒃ ᑮᓇᐅᔭᕐᓂᒃ. ᑲᑐᔾᔨᖃᑎᖃᕐᓂᕐᒥᑦ ᓴᖅᑭᔮᕙᒌᖅᑐᓂᑦ ᓄᓇᖃᖅᑳᖅᓯᒪᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᓂᑦ ᓇᑲᑎᕆᔨᓂᑦ ᑲᒻᐸᓂᓂ ᑕᑯᔭᐅᓚᐅᖅᑐᑦ ᐱᕕᖃᖅᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐅᓂᒃᑳᖅᑎᓄᑦ ᐃᑲᔪᕐᓂᖃᕐᓂᕐᒧᑦ ᐊᔪᙱᑕᒥᓄᑦ. ᐱᖃᑕᐅᓚᐅᖅᑐᑦ ᐃᓱᒪᓚᐅᕐᒥᔪᑦ ᐃᑲᔫᑎᒃᓴᓂᑦ ᐱᑕᖃᒃᑲᓐᓂᕆᐊᖃᕐᓂᖓᓂ, ᑖᒃᑯᓂᖓᓗ ᐱᓕᕆᔨᓪᓗᐊᑕᕐᓂᒃ ᑐᓴᖅᓴᐅᕙᒃᑐᓂᑦ, ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᓂᑦ ᐱᕙᓪᓕᐊᔪᓕᐅᖅᑎᓂᑦ ᐊᒻᒪᓗ ᐅᖃᐅᓯᕐᓂᒃ ᓴᓇᕙᒃᑐᓂᑦ, ᑐᓴᖅᓴᐅᔪᒃᓴᓕᖓᓂᒃ ᓴᖅᑮᕙᖕᓂᖏᓐᓄᑦ ᓄᓇᓕᖏᓐᓂᖔᖅᑐᓂᒃ ᐃᓱᒪᒋᔭᖃᕆᐊᓖᑦ.
ᒪᒃᑯᒃᑐᑦ, ᐃᓕᓐᓂᐊᕐᓂᖅ ᐊᒻᒪᓗ ᐱᓕᒻᒪᒃᓴᐃᓂᖅ: ᐱᕕᒃᓴᖃᖅᑎᑦᑎᓂᕐᒥᑦ ᐃᖅᑲᓇᐃᔮᒃᓴᓂᑦ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐱᒍᒪᓂᖃᕐᓂᖅᓴᐅᓕᕋᔭᕐᒪᑕ ᑐᓴᖅᓴᐅᑎᑦᑎᓂᕐᒧᑦ ᐱᓕᕆᕝᕕᐅᔪᒥᑦ ᐊᒻᒪᓗ ᓴᖅᑮᓗᓂ ᓯᕗᓂᒃᓴᒥᑦ ᐊᔪᙱᓐᓂᖃᕋᔭᖅᑐᓂᑦ. ᑮᓇᐅᔭᖃᖅᑎᑕᐅᑦᑎᐊᖅᑐᑦ ᐊᔪᕈᓐᓃᖅᓴᐃᓂᕐᒧᑦ ᐊᒻᒪᓗ ᐃᖅᑲᓇᐃᔭᖅᑎᑦᑎᓂᕐᒥᑦ ᐱᓕᕆᐊᒃᓴᓂᑦ ᑕᒡᕘᓇ ᐃᑲᔪᕐᓂᖃᕋᔭᖅᑐᑦ. ᐃᓕᓐᓂᐊᕐᓂᓪᓚᑦᑖᕐᓂᒃᑯᑦ ᐅᕝᕙᓘᓐᓃᑦ ᐃᖅᑲᓇᐃᔭᓯᓐᓈᑦ ᐱᓕᒻᒪᒃᓴᐃᓂᒃᑯᑦ, ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᒻᒪᕆᐅᓂᖓᓂ ᒪᓂᒪᑎᑦᑎᓂᕐᒥᑦ ᐱᓕᕆᔨᒻᒪᕆᐅᓂᕐᒧᑦ ᐱᕙᓪᓕᐊᑎᑦᑎᓂᕐᒥᑦ ᐱᕕᒃᓴᖃᕐᓂᐅᔪᓂᑦ ᐃᖅᑲᓇᐃᔭᖅᑎᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓄᑦ ᑐᕌᖓᔪᓄᑦ ᐱᔭᒃᓴᕆᔭᐅᔪᓄᑦ; ᐃᓂᒋᔭᐅᔪᒥᑦ ᐱᓕᒻᒪᒃᓴᐃᓂᖅ ᐃᑲᔪᕐᓂᖃᕐᒥᔪᖅ ᐃᖅᑲᓇᐃᔭᖅᑎᖃᐃᓐᓇᓂᕐᒥ. ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐃᓂᒋᔭᐅᓪᓚᑦᑖᖅᑐᓂᑦ ᓇᑲᑎᕆᓂᕐᒧᑦ ᐊᒻᒪᓗ ᐱᓕᒻᒪᒃᓴᐃᕐᒧᑦ ᐃᓂᓂ ᐊᑐᐃᓐᓇᐅᑎᑕᐅᓪᓗᐊᖅᑐᑦ ᓄᓇᓕᕋᓛᖑᓂᖅᓴᐅᔪᓂᑦ, ᓄᓇᓕᐸᐅᔭᑐᐊᖑᖏᑦᑐᓂᑦ.
ᓴᖅᑮᓗᑎ ᑲᑐᔾᔨᖃᑎᒌᖑᔪᒥ ᑭᒡᒐᖅᑐᐃᓂᕐᒧᑦ ᓄᓇᖃᖅᑳᖅᓯᒪᔪᓂᑦ ᑐᓴᖅᓴᐅᕙᒃᑐᓄᑦ: ᑕᒪᕐᒥᐸᓗᒃ ᐊᖏᖅᓯᒪᓚᐅᖅᑐᑦ ᑲᓇᑕᒥ ᑲᑐᔾᔨᖃᑎᒌᖑᔪᒥ ᓂᐱᒋᔭᐅᒍᓐᓇᖅᑐᒥ ᑭᒡᒐᖅᑐᐃᓗᓂ ᓄᓇᖃᖅᑳᖅᓯᒪᔪᓂᑦ ᑐᓴᖅᓴᐅᕙᒃᑐᓂᑦ ᐱᓕᕆᖃᑎᒌᓯᓐᓈᕈᓐᓇᕐᓗᑎ, ᐃᑲᔪᕐᓂᕐᒥᑦ ᐊᒻᒪᓗ ᐃᑲᔪᖅᓱᓂᕐᒥᑦ ᑐᐊᕕᕐᓇᖅᑐᒥ ᐱᑕᖃᕆᐊᖃᓕᖅᑐᖅ. ᐱᖃᑕᐅᓚᐅᖅᑐᑦ ᐃᓚᖏᑦ ᓇᓗᓇᐃᖅᓯᓚᐅᖅᑐᑦ ᐱᓕᕆᕝᕕᐅᔪᖅ ᐃᓚᖃᓪᓗᐊᖅᑐᖅ ᐊᕕᒃᑐᖅᓯᒪᔪᓂᑦ ᑭᒡᒐᖅᑐᐃᓂᕐᒥᑦ. ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐃᓄᑑᖅᑰᔨᓐᓂᖏᓐᓂᒃ ᑐᓴᖅᓴᐅᑎᑦᑎᓂᕐᒧᑦ ᐃᖅᑲᓇᐃᔭᖅᑎᐅᔪᓂᑦ ᐅᖓᓯᒃᑐᒦᑦᑐᓂᑦ, ᑲᓲᒪᖃᑎᖃᕆᐊᖃᕐᓂᖏᓐᓂᓪᓗ ᐃᓕᓐᓂᐊᖃᑦᑕᐅᑎᕙᒡᓗᑎᓗ. ᐱᒻᒪᕆᐅᓂᖓ ᐱᕕᒃᓴᖃᕐᓂᐅᔪᓄᑦ ᐱᓕᕆᖃᑎᖃᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᑲᑐᔾᔨᖃᑎᒌᓂᑦ ᓄᓇᓕᕐᔪᐊᑦ ᐊᓯᖏᓐᓂᒃ ᐅᖃᐅᓯᐅᓚᐅᕐᒥᔪᖅ. ᐱᒋᐊᖅᑎᑦᑎᓂᕐᒥᑦ ᑕᐃᒪᐃᑦᑐᒥ ᑲᑐᔾᔨᖃᑎᒌᖑᔪᒥ ᐱᒋᐊᕈᑎᖃᕐᓂᕐᒧᑦ ᐊᒻᒪᓗ ᑲᔪᓰᓐᓇᖅᑐᒥ ᑮᓇᐅᔭᖃᖅᑎᑕᐅᒋᐊᖃᕋᔭᖅᑐᖅ.
ᓴᖅᑮᓗᑎ ᑐᖅᑯᖅᓯᒪᔪᒃᑯᕕᖕᓂᑦ ᐊᒻᒪᓗ ᓄᐊᑦᑎᕕᖕᓂ: ᐱᖃᑕᐅᓚᐅᖅᑐᑦ ᐃᒃᐱᒍᓱᓚᐅᖅᑐᖅ ᑐᖅᑯᖅᓯᒪᔪᒃᑯᕕᑦ ᐱᒻᒪᕆᐅᓚᐅᖅᑐᖅ ᖃᐅᔨᒪᑦᑎᐊᕆᐊᕐᓂᕐᒥᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᑦ ᓇᓂᓯᔪᓐᓇᕐᓂᐊᕐᒪᑕ, ᑐᖅᑯᐃᓗᑎ ᐊᒻᒪᓗ ᐊᑐᐃᓐᓇᖃᕐᕕᐅᓗᑎ ᓄᓇᖃᖅᑳᖅᓯᒪᔪᑦ ᐃᙱᐅᓯᖏᓐᓂᒃ, ᑕᕐᕆᔮᒃᓴᖏᓐᓂᒃ ᐊᒻᒪᓗ ᑕᓚᕕᓴᒃᑰᕙᒃᑐᓂᑦ. ᓇᓗᓇᐃᖅᓯᓚᐅᖅᑐᑦ ᐊᕝᕕᐊᕈᑎᑕᖃᕐᓂᖓᓂ ᐊᑐᐃᓐᓇᖃᕐᕕᐅᓂᕐᒥᑦ ᐃᑲᔫᑎᒃᓴᓄᑦ ᑐᖅᑯᐃᓂᕐᒧᑦ ᑕᕐᕆᔮᒃᓴᓕᐊᓂᑦ ᐊᒻᒪᓗ ᓂᐱᓕᐅᖅᓯᒪᔪᓂᑦ ᓂᔾᔭᐅᓯᔭᖅᑎᓂᑦ, ᓴᖅᑮᓚᐅᕆᓪᓗᑎᓗ ᐱᑕᖃᕆᐊᖃᕐᓂᖓᓂ ᓱᓇᒃᑯᑖᓂᑦ ᐊᓯᐅᑎᑦᑎᑦᑕᐃᓕᒪᓂᕐᒧᑦ ᓄᓇᖃᖅᑳᖅᓯᒪᔪᓂᙶᖅᑐᓂᑦ, ᐱᓗᐊᙳᐊᖅᑐᒥ ᐅᖃᓪᓚᒃᑎᓪᓗᒋᑦ ᐅᕝᕙᓘᓐᓃᑦ ᐃᙱᖅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑎᒍᑦ. ᐱᖅᑯᓯᑐᖃᒃᑯᑦ ᖃᐅᔨᒪᔭᐅᔪᑦ ᐃᓚᖏᓐᓂᒃ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂᒃ ᐅᖃᐅᓯᐅᔭᕆᐊᓖᑦ ᓄᓇᓕᖓᓂ ᑭᓯᐊᓂ, ᒪᓕᒐᖅᑕᖃᐅᕆᐊᓕᒃ ᓴᐳᔾᔨᓂᕐᒧᑦ ᑐᖅᑯᖅᑕᐅᓯᒪᔪᓂᑦ ᑐᓴᖅᓴᐅᑎᑦᑎᓂᕐᒧᑦ ᓱᓇᒃᑯᑖᓂᑦ.
ᓰᐲᓰᒃᑯᑦ (CBC) ᐱᓕᕆᒋᐊᓕᖓ, ᐊᒻᒪᓗ ᐃᖅᑲᓇᐃᔭᕐᓂᖅ ᓰᐲᓰᒃᑯᓐᓂ: ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᓰᐲᓰ ᐅᑭᐅᖅᑕᖅᑐᒥ, ᐃᓚᓕᐅᔾᔨᓲᖅ ᓄᓇᖃᖅᑳᖅᓯᒪᔪᑦ ᐅᓂᒃᑳᓕᐊᖏᓐᓂᒃ, ᐆᒃᑑᑎᒋᔭᐅᔪᓐᓇᖅᑐᖅ ᑕᒪᐃᓐᓄᑦ ᓰᐲᓰ ᑕᓚᕕᓴᒃᑰᖃᑦᑕᖅᑐᓄᑦ ᐊᒻᒪᓗ ᓈᓚᐅᑎᓄᑦ. ᐅᐸᒍᑎᓯᒪᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᕕᒃᓴᖃᕐᓂᐅᔪᓂᑦ ᓴᖅᑭᔮᖅᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓂᙶᖅᑐᓂᑦ ᓰᐲᓰ ᔭᒻᑯᑦ ᑭᓯᐊᓂ ᓇᓗᓇᐃᖅᓯᓚᐅᖅᑐᑦ ᐃᓚᖏᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᑦ ᐊᑐᐃᓐᓇᖃᕝᕕᐅᙱᑦᑐᑦ ᖃᕋᓴᐅᔭᒃᑰᕈᑎᓂᑦ. ᐃᓚᖏᑦ ᐅᖃᐅᓯᖃᓚᐅᖅᑐᑦ ᐊᒃᓱᕈᕐᓂᖃᖅᖢᑎᒃ ᓰᐲᓰᒃᑯᑦ ᓴᖅᑮᓚᐅᙱᓐᓂᖏᓐᓂᒃ ᐱᓕᕆᐊᒃᓴᕆᔭᖏᓐᓂᒃ, ᐱᓗᐊᙳᐊᖅᑐᒥ ᑕᓚᕕᓴᒃᑯᑦ, ᐃᓱᒪᓚᐅᖅᖢᑎᒡᓗ ᐱᕕᒃᓴᖃᕐᓂᖅᓴᐅᒋᐊᓖᑦ ᓴᖅᑭᔮᖅᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᑐᓴᐅᒪᔾᔪᑎᓄᑦ ᐊᒻᒪᓗ ᓰᐲᓰᒃᑯᑦ. ᓰᐲᓰ ᐃᓄᓕᒫᓂᙶᖅᑐᓂᑦ ᑮᓇᐅᔭᖅᑖᕙᖕᒪᑕ ᐊᐅᓚᑦᑎᓂᕐᒧᑦ, ᐱᖃᑕᐅᓚᐅᖅᑐᑦ ᐃᒃᐱᒍᓱᓚᐅᖅᑐᑦ ᓄᓇᖃᖅᑳᖅᓯᒪᔪᓄᑦ ᓴᖅᑭᔮᕐᓂᖅᓴᐅᔪᖃᕆᐊᓕᒃ, ᓄᓇᖃᖅᑳᖅᓯᒪᔪᓂᒡᓗ ᐅᓄᕐᓂᖅᓴᐅᒋᐊᓖᑦ ᐃᖅᑲᓇᐃᔭᕐᓗᑎ ᐱᓕᕆᔨᓪᓗᐊᑕᐅᓗᑎ ᐊᒻᒪᓗ ᐊᐅᓚᑦᑎᔨᐅᓗᑎ. ᐃᑲᔪᕈᒪᓂᕐᒧᑦ ᑕᒪᓐᓇ ᑎᑭᐅᒪᔭᐅᖁᓪᓗᒍ, ᐱᖃᑕᐅᓚᐅᖅᑐᑦ ᓇᓗᓇᐅᖅᓯᓚᐅᖅᑐᑦ ᓰᐲᓰᒃᑯᑦ ᐊᑐᐃᓐᓇᐅᑎᑦᑎᒋᐊᓖᑦ ᐅᓪᓗᓕᒫᓐᓇᖅᑐᒥ ᐱᓕᒻᒪᒃᓴᐃᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐃᖅᑲᓇᐃᔮᖃᕈᒪᔪᓄᑦ ᑐᓴᖅᓴᐅᑎᑦᑎᓂᕐᒥᑦ.
ᓄᓇᓖᑦ ᓇᖕᒥᓂ ᐊᑐᐊᒐᓖᑦ, ᒪᑭᒪᔾᔪᑎᓖᑦ, ᑮᓇᐅᔭᓖᑦ: ᓄᓇᖃᖅᑳᖅᓯᒪᔪᑦ ᓄᓇᓖᑦ ᐃᓚᖏᑦ ᓴᖅᑮᓯᒪᔪᑦ ᓇᖕᒥᓂᖅ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᓂᒃ, ᒪᑭᒪᔾᔪᑎᒃᓴᓂᑦ ᐊᒻᒪᓗ ᑮᓇᐅᔭᖅᑖᕐᕕᖏᓐᓂᒃ, ᐃᒃᐱᒋᔭᐅᓚᐅᖅᖢᓂᓗ ᓄᓇᓖᑦ ᐱᒋᐊᖃᖅᑕᖏᑦ ᓇᖕᒥᓂᖅᓱᕐᓂᕐᒧᑦ ᐊᒻᒪᓗ ᓇᖕᒥᓂᖅ ᐱᓕᕆᓂᕐᒧᑦ ᐃᓕᓴᕆᔭᐅᕆᐊᓖᑦ, ᐱᖃᓯᐅᔾᔨᓂᕐᒧᓪᓗ ᑐᓴᖅᓴᐅᑎᑦᑎᓂᕐᒧᑦ ᒪᓕᒐᕐᓄᑦ.
ᐱᒻᒪᕆᐅᓂᖓ ᖃᒃᑲᓐᓂᐊᒍᑦ ᐊᒻᒪᓗ ᑲᔪᓯᓂᖃᖅᑎᑦᑎᓂᕐᒧᑦ ᑮᓇᐅᔭᕐᓂᒃ ᓇᓗᓇᐃᖅᑕᐅᒐᔪᓚᐅᖅᑐᖅ ᐱᔾᔪᑎᓪᓗᐊᑕᐅᓪᓗᓂ ᐃᑲᔪᕈᑕᐅᓗᓂ ᐋᖅᑭᒃᓯᓂᕐᒧᑦ ᐅᓄᖅᑐᓄᑦ ᐊᑲᐅᙱᓕᐅᕈᑕᐅᔪᓄᑦ ᐅᖃᐅᓯᐅᔪᓄᑦ ᑲᑎᖃᑎᖃᖅᑎᓪᓗᒋᑦ.
ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᑐᑦ ᑮᓇᐅᔭᖅᑕᖃᒃᑲᓐᓂᕆᐊᖃᕐᓂᖓᓂ ᑲᒪᒋᔭᖃᕐᓂᕐᒧᑦ ᐊᔾᔨᐅᙱᑦᑐᒧᑦ ᐱᔭᐅᔭᕆᐊᓕᖕᓂᒃ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᕙᒃᑐᓄᑦ, ᐊᒻᒪᓗ ᐋᖅᑭᒃᑕᐅᓗᓂ ᓇᓕᒧᖃᑦᑕᙱᓐᓂᖓ ᑮᓇᐅᔭᖃᖅᑎᑦᑎᓂᕐᒥᑦ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᑕᐃᒪᐃᑦᑑᖃᑦᑕᖅᓯᒪᓂᖓᓄᑦ ᑕᑯᖃᓯᐅᑎᓗᒍ ᐱᓕᕆᔨᓪᓗᐊᑕᕐᓂᒃ ᑐᓴᖅᓴᐅᑎᑦᑎᓂᕐᒧᑦ ᐋᖅᑭᒃᓯᒪᔪᒥᑦ. ᐱᓗᐊᙳᐊᖅᑐᒥ, ᑐᓴᓚᐅᖅᑐᒍᑦ ᑮᓇᐅᔭᖅᑕᖃᕆᐊᓕᒃ ᐱᓕᒻᒪᒃᓴᐅᓂᕐᒧᑦ, ᐃᖅᑲᓇᐃᔭᖅᑎᑦᑎᓂᕐᒧᑦ ᐊᒻᒪᓗ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᓂᑦ ᑐᓴᖅᓴᐅᕙᒃᑐᓂᑦ, ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᓂᑦ ᐊᒻᒪᓗ ᐃᖅᑲᓇᐃᔭᖅᑎᓂᑦ, ᐃᑲᔪᖅᓱᓂᕐᒧᑦ ᐊᑭᖏᓐᓂᒃ ᑐᕌᖓᖃᓯᐅᑎᔪᓂᒃ ᐅᖓᓯᒃᑐᒦᓐᓂᖏᓐᓄᑦ, ᐱᐅᓯᕚᓪᓕᖅᑎᑦᑎᓂᕐᒧᑦ ᓇᑭᑎᕆᔾᔨᔪᑎᓂᑦ ᓱᓇᒃᑯᑖᓂᑦ, ᐱᕙᓪᓕᐊᑎᑦᑎᓂᕐᒧᑦ ᐊᒻᒪᓗ ᐋᖅᑭᐅᒪᑎᑦᑎᓂᕐᒧᑦ ᒪᑭᒪᔾᔪᑎᒃᓴᓂᑦ, ᐃᑲᔪᖅᓱᓂᕐᒥᑦ ᓇᓕᒧᒃᑐᒥᑦ ᐊᑐᐃᓐᓇᖃᕐᕕᐅᖁᓪᓗᒋᑦ ᑐᓴᐅᒪᔪᓕᕆᓂᕐᒧᑦ ᐱᔨᑦᑎᕋᐅᑎᓄᑦ ᐊᒻᒪᓗ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑎᒍᑦ ᑕᑯᒃᓴᐅᕙᒃᑐᓂᑦ ᐊᒻᒪᓗ ᐱᕙᓪᓕᐊᔪᓂᑦ.
ᐃᓕᓴᖅᓯᓂᕐᒥᑦ ᑕᒪᓐᓇ ᐃᓚᒋᔭᐅᓚᐅᙱᑦᑐᖅ ᐊᑖᒍᑦ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ, ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᑐᑦ ᑮᓇᐅᔭᖃᖅᑎᑕᐅᓂᐅᔪᖅ ᐅᐊᖕᓇᒥ ᓄᓇᖃᖅᑳᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᑮᓇᐅᔭᑦ ᐃᓚᒋᐊᖅᑕᐅᓯᒪᙱᑐᑦ ᐊᕐᕌᒍᓄᑦ 30-ᓄᑦ ᐊᒻᒪᓗ ᑮᓇᐅᔭᑦ ᑐᓐᓂᖅᓴᖅᑕᐅᕙᒃᑐᑦ ᑖᒃᑯᓄᖓᔅᓴᐃᓐᓇᖅ. ᑐᓴᓚᐅᖅᑐᒍᑦ ᓇᓚᐅᒃᑖᕋᒃᓴᐅᔪᑦ ᐊᒻᒪᓗ ᐱᑕᖃᐃᓐᓇᖅᑐᒥ ᐊᑯᓂᐅᔪᒥ ᑮᓇᐅᔭᓪᓗᐊᑕᕐᓂᒃ ᐱᑕᖃᕆᐊᓕᒃ, ᐊᑐᑲᐃᓐᓇᕐᓂᐊᖅᑐᓂᐅᖏᑦᑐᖅ ᐊᒻᒪᓗ ᑭᓚᒻᒥᐅᓇᖅᑐᒃᑰᖏᑦᑐᖅ ᑮᓇᐅᔭᕐᓂᒃ, ᐊᔪᕈᓐᓃᖅᑎᑦᑎᓂᐊᕐᒪᑕ ᓄᓇᓕᖏᓐᓂᒃ. ᐅᓄᖅᑐᑦ ᐅᖃᓚᐅᖅᑐᑦ ᐱᑕᖃᕆᐊᖃᓪᓚᕆᒃᑐᒥᑦ ᑮᓇᐅᔭᖅᑖᕐᕕᐅᔪᓐᓇᖅᑐᒥ ᓴᖅᑭᑎᑦᑎᓗᑎ ᑖᒃᑯᓄᖓ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᓐᓄᑦ ᐃᑲᔪᕐᓂᕐᒧᑦ ᑮᓇᐅᔭᖅᑖᕐᓂᕐᒧᑦ ᐊᑲᐅᙱᓕᐅᕈᑕᐅᕙᒃᑐᓄᑦ ᓇᓕᒧᒃᓯᔾᔫᒥᓂᐊᕐᒪᑕᓗ. ᓇᓗᓇᐃᖅᓯᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᑐᓴᖅᓴᐅᕙᒃᑐᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᑦ ᐃᒃᓯᕙᐅᑕᖃᕆᐊᓖᑦ ᑮᓇᐅᔭᖃᖅᑎᑦᑎᓂᕐᒧᑦ ᐃᒃᓯᕚᖃᑎᒌᒃᑐᓂᑦ.
ᑮᓇᐅᔭᑦ ᐊᒥᒐᓗᐊᕐᓂᖏᓐᓄᑦ ᐊᒻᒪᓗ ᐱᓕᕆᐊᖃᕋᓱᐊᕐᓂᐅᔪᖅ ᐊᑯᓂᐅᓇᖅᖢᓂ, ᐃᓚᖏᑦ ᐅᖃᓚᐅᖅᑐᑦ ᑐᖅᑯᖅᓯᒪᔪᒃᑯᕕᖕᒥᑦ ᑮᓇᐅᔭᖅᑖᕐᕕᐅᔪᓐᓇᖅᑐᓂᑦ ᓴᖅᑭᑕᐅᒋᐊᓕᒃ ᐃᑲᔪᖅᓱᖅᑕᐅᓗᑎᓗ ᑮᓇᐅᔭᕐᓄᑦ ᑐᒃᓯᕋᕋᓱᐊᖅᑎᓪᓗᒋᑦ. ᑐᓴᓚᐅᕐᒥᔪᑦ ᐊᔪᙱᑎᑕᐅᓂᕐᒧᑦ ᐃᓱᒪᒋᔭᐅᔪᑦ ᑮᓇᐅᔭᖃᖅᑎᑦᑎᔨᓪᓗᐊᑕᕐᓂᒃ ᑐᕌᖓᓂᖃᓗᐊᖅᐸᖏᑦᑐᑦ ᓄᓇᖃᖅᑳᖅᓯᒪᔪᓄᑦ ᐊᑐᖅᑕᐅᓪᓚᕆᕙᒃᑐᓄᑦ.
ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᑕᖃᕆᐊᖃᕐᓂᖓᓂ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᐱᐅᓯᕚᓪᓕᖅᑎᑦᑎᓗᑎ ᓄᓇᖃᖅᑳᖅᓯᒪᔪᓂᑦ ᑭᒡᒐᖅᑐᐃᓂᖏᑦ ᐱᓕᕆᕝᕕᖓᓂᑦ, ᑕᑎᖃᖃᑎᒌᓕᕈᓐᓇᕐᓗᑎ ᓄᓇᖃᖅᑳᖅᓯᒪᔪᑦ ᑐᓴᖅᓴᐅᕙᒃᑐᑦ ᐊᒻᒪᓗ ᑐᓴᖅᑕᐅᔪᒃᓴᓕᐊᓂᒃ ᓴᖅᑭᑎᑦᑎᔨᐅᔪᓂᑦ, ᐊᒻᒪᓗ ᑲᒪᒋᔭᐅᑦᑎᐊᕐᓗᓂ ᑐᓴᖅᓴᐅᑎᑦᑎᓂᕐᒧᑦ ᐱᓕᕆᕝᕕᖕᒥᑦ ᖃᐅᔨᒪᑦᑎᐊᕆᐊᕐᓂᕐᒧᑦ ᑭᒡᒐᖅᑐᖅᑕᐅᑦᑎᐊᕋᓗᐊᕐᒪᖔᑦᑕ ᓄᓇᖃᖅᑳᖅᓯᒪᔪᑦ.
ᐱᓗᐊᙳᐊᖅᑐᒥ, ᐃᓚᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑖᒃᑯᐊ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᐃᖅᑲᓇᐃᔭᖅᑎᑖᒃᑲᓐᓂᕆᐊᓖᑦ ᓄᓇᖃᖅᑳᖅᓯᒪᔪᓂᑦ ᐊᒻᒪᓗ ᖃᐅᔨᒪᒋᐊᕐᓗᑎᑦ ᑲᒥᓴᒃᑯᑦ ᐃᖅᑲᓇᐃᔭᖅᑎᖏᑦ ᐃᓕᖅᑯᓯᕐᒥᑦ ᐅᔾᔨᕈᓱᓐᓂᕐᒧᑦ ᐃᓕᓐᓂᐊᖅᑎᑕᐅᓗᑎ. ᐱᖃᑕᐅᓚᐅᖅᑐᑦ ᐃᒃᐱᒍᓱᓚᐅᖅᑐᑦ ᓄᓇᖃᖅᑳᖅᓯᒪᔪᓄᑦ ᑲᑎᒪᔨᕋᓛᓂᑦ ᐅᕝᕙᓘᓐᓃᑦ ᐱᓕᕆᖃᑎᒌᖑᔪᓂᑦ ᐋᖅᑭᓱᐃᒋᐊᓖᑦ ᑖᒃᑯᓂᖓ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᓐᓂᒃ ᐃᑲᔪᕐᓂᕐᒧᑦ ᑐᓴᐅᒪᖃᑎᒌᓐᓂᖅᓴᐅᓗᑎ ᐊᒻᒪᓗ ᐊᑐᐃᓐᓇᖃᕐᕕᐅᓴᕋᐃᓗᑎ ᑐᑭᓯᒋᐊᕈᑎᒃᓴᓂᑦ ᐊᒻᒪᓗ ᐃᑲᔪᖅᑕᐅᓗᑎ ᑕᐃᒪᐃᒋᐊᖃᓕᕋᐃᑉᐸᑕ. ᐃᒃᐱᒍᓱᓚᐅᖅᑐᑦ ᒪᓕᒐᑦᑎᒍᑦ ᐱᓕᓂᐅᔪᑦ ᐱᔭᕆᐊᑭᑎᑕᐅᓗᑎ ᐊᒻᒪᓗ ᐊᒃᔪᕈᕐᓇᖏᓪᓗᑎ, ᑖᒃᑯᐊᓗ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᑐᓴᖅᑎᑦᑎᒐᔪᖃᑦᑕᕆᐊᓖᑦ ᓄᓇᖃᖅᑳᖅᓯᒪᔪᓂᑦ ᓄᓇᓕᖕᓂᑦ ᓈᓚᒃᑐᓂᓪᓗ.
ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᓄᑖᖑᔪᖅ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᖓ ᐃᒃᐱᒍᓱᑦᑎᐊᕆᐊᓕᒃ ᐊᒻᒪᓗ ᑭᑭᑦᑎᖏᓪᓗᓂ ᓄᓇᖃᖅᑳᖅᓯᒪᔪᓕᒫᓂᑦ. ᑐᑭᓯᓇᕆᐊᓕᒃ ᖃᓄᖅ ᑲᒪᒋᔭᖃᓲᖑᒻᒪᖓᖅ ᐊᑐᐃᓐᓇᐅᑎᑦᑎᓂᕐᒥᑦ ᐊᒻᒪᓗ ᓄᓇᖃᖅᑳᖅᓯᒪᔪᓂᙶᖅᑐᓂᑦ. ᐊᖏᖃᑎᒌᒃᑐᐃᓐᓇᐅᓚᖅᑐᑦ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᒪᓕᒋᐊᓖᑦ ᐱᓪᓗᐊᑕᕐᓄᑦ ᑐᓴᐅᒪᔾᔪᑎᓄᑦ ᐃᓚᖃᕆᐊᓖᑦ ᒪᓕᒋᐊᓕᖕᓂᒃ ᑕᑯᒃᓴᐅᑎᑦᑎᓂᕐᒧᑦ ᐊᒻᒪᓗ ᐃᑲᔪᖅᓱᓂᕐᒧᑦ ᓄᓇᖃᖅᑳᖅᓯᒪᔪᓂᙶᖅᑐᓂᑦ ᐊᒻᒪᓗ ᐊᔪᙱᓐᓂᐅᔪᓂᒃ. ᐱᖃᑕᐅᓚᐅᖅᑐᑦ ᓇᓗᓇᐃᖅᓯᓚᐅᕐᒥᔪᑦ ᐱᒻᒪᕆᐅᓂᖓᓂ ᐃᓕᓐᓂᐊᕐᓂᕐᒥᑦ ᑐᓴᖅᓴᐅᑎᑦᑎᓂᕐᒧᑦ ᑐᕌᖓᔪᓂᑦ ᐊᑐᕆᐊᓕᖕᓂᒃ ᖃᐅᔨᔭᐅᓂᑰᔪᓂᑦ ᐅᓂᒃᑳᓕᐊᓂᑦ ᓲᕐᓗ ᑕᐃᒃᑯᓇᙵᑦ ᓱᓕᔪᓂᑦ ᐊᒻᒪᓗ ᓴᐃᒻᒪᖃᑎᒌᓐᓂᕐᒧᑦ ᑲᒥᓴᒃᑯᓐᓂ ᐊᒻᒪᓗ ᑲᓇᑕᒥ ᖃᐅᔨᓴᕐᓂᐅᓚᐅᖅᑐᒥ ᐊᓯᐅᔨᔭᐅᓯᒪᔪᓄᑦ ᐊᒻᒪᓗ ᐃᓄᐊᖅᑕᐅᖃᑦᑕᖅᑐᓄᑦ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᓂᕕᐊᖅᓵᓂᓪᓗ ᓴᖅᑮᓂᐊᖅᑎᓪᓗᒋᑦ ᓄᑖᒥ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᒥᑦ.
ᐱᖃᑕᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐱᒻᒪᕆᐅᔪᓂᑦ ᐃᓱᒪᒋᔭᐅᔪᓂᒃ ᐊᔾᔨᒌᙱᑦᑐᓄᑦ ᐃᓱᒫᓘᑕᐅᔪᓄᑦ ᐅᕝᕙᓘᓐᓃᑦ ᐅᖃᐅᓯᒃᓴᕆᔭᐅᔪᓂᑦ, ᑕᐃᒃᑯᐊᓗ ᓯᓚᑖᓃᑦᑐᓂᑦ ᑖᔅᓱᒪ ᑲᓇᑕᒥ ᓈᓚᐅᑎᒧᑦ−ᑕᓚᕕᓴᒧᑦ ᐊᒻᒪᓗ ᑐᓴᐅᒪᔪᓕᕆᔾᔪᑎᓄᑦ ᑲᒥᓴᖓᑦ ᐅᕝᕙᓘᓐᓃᑦ ᐱᓕᕆᓂᐅᔪᒥᑦ ᐱᕙᓪᓕᐊᖃᑎᒌᓐᓂᕐᒥᑦ ᓄᑖᒥ ᓄᓇᖃᖅᑳᖅᓯᒪᔪᓄᑦ ᑐᓴᖅᓴᐅᑎᑦᑎᓂᕐᒧᑦ ᐊᑐᐊᒐᕐᒥᑦ. ᑲᒥᓴᒃᑯᑦ ᖁᔭᓕᕗᑦ ᐱᖃᑕᐅᓚᐅᖅᑐᓂᑦ ᐅᖃᐅᓯᒃᓴᒥᓄᑦ ᐊᒻᒪᓗ ᐅᖃᕈᒪᓪᓗᑎᒃ ᐅᖃᐅᓯᔪᓕᒫᑦ ᑎᑎᖅᑕᐅᓚᐅᖅᑐᑦ, ᓇᓗᓇᐃᖅᓯᒪᙱᒃᑲᓗᐊᖅᑲᑕ ᑕᒡᕙᓂ ᐅᓂᒃᑳᓕᐊᖑᓯᒪᔪᒥᑦ.